Revelation of John 9
1 aXe angelo ta'uvesou noxi'a mutaunu xoolau noxou, la eni emaisou oto vile molu teitexi no loxotolo mulapau mulu'e no lia. Anu mulu'e, la milosou siliko sou ukisiinu aitenga sou taxa e kaluxu uasi. 2 bIa no mine anu mukisiinu, la navu umuxu muuatu no anu loxo itauxu saavu toxoxa'a. La umuxu isivoxoxu mutaasou aso ilou loxotolo. 3La ta musia'e ta taula mixali no anu navu umuxu ne, la xavine'i loxo ta tanga sou milu'e no lia 'o. 4 cLa mivikalane'i lexe umomomo sou i'oxo masuanu ia'eia'e ilou sesesee mo ovuovu no lia 'o uasi, ia imaisi'a ta mitema ane sosovo noxou Lataua uxolu no 'alaie'i uasi la ikasi'asi. 5Ane'i milosi'a xavi sou ive'ave'a isoisoli uasi, ia ilosi'a navunavusi so'io ta'uve. Xe navunavu ane ane'i ixamulinu ne, anu loxo tanga uvenge la taxamulinu. 6 dNo nano no voxo ane ne, la ta mitema ikakamuli solixa'a, ia isoli a loxovaa? Mo ane'i imasaxa lexe isoli, ia soli u'ume'a ulai.7 eIa ta taula ne, ie'i loxo ta oosi sou 'oto'oto. Mo no kisikisi'a, la mitaataa loxo kisivalu mi'oxo no anu xoulu, xe ie'i loxo ta mitema. 8 fLaxusi'a ne loxo ta sema laxusi'a xe anaxa'a loxo laeoni anaxu. 9 gXe no anu tokolomoi'a, la mii sou siovesou lutune'i mi'oxonu no anu aeni xe vivisi'a luluxu loxo ta oosi mo karisi tavu'alo ipasipaa iiave sou ilai i'oto. 10Xe ane'i xela'a loxo tanga e utuvanenge no anu, la xavi no anu xela'a ne umomomo sou ulosi'a ta mitema navunavu uxolu so'io ta'uve. 11Xe ane'i tilasi'a kalumo, tila ne anu angelo sou taxa e kaluxu uasi. Ualasou no anu Evalaio la ilemolu lexe Abadoni xe no anu vaikala noxi'a ta Xiliki la ilemolu lexe Apolioni. ▼
12La tu'utu'umaxu vile a mukalu ne. Ia ta tamei la a uxali uao.
13Xe angelo muxatele vilesou noxi'a mitaunu xoolau noxou, la eni elomusou 'ava vile muxali no anu sikilinu tami'a utulu no anu valovalo ia mi'oxonu no anu xoulu no talaxu Lataua. 14Anu muvikalanu angelo muxatele vilesou noxi'a e utetelisou xoolau ne aloxo 'o, “Nalulusi'a ta angelo tami'a e misakisakine'i mixolu no lexa tila ne ualasou lexe no anu si Iuplatesi.” 15La sou ta angelo tami'a e mixolu miloo sou aso ngiou ilou voxo mo so'io xe tauu ie ane Lataua musosovosou sou ilulusi'a. Lataua ululusi'a sou ilai ive'ave'a xalee tatalusi'a ta mitema isoisoli. 16La eni elomusou itiitisi'a ta mitema sou 'oto'oto mixolu no latane'i ta oosi mumomomo loxo 200 milioni.
17Xe no malemalei noxilo loxo aipiepiena, la eni emaisi'a ta mitema sou 'oto'oto mixolu no latane'i ta oosi aloxo 'o. Ane'i tokolomoi'a ne, mii sou siovesou lutune'i vile vilesi muxolu no lutune'i. Ia mii sou siovesou lutune'i ne, kaukavuxu lauolauoinu manina loxo navu mo 'ela'ela manina xe kuakuala loxo taupea. Mo ta oosi ne, kisi'a loxo ta laeoni ia navu ilou umuxu mo taupea ialuxu ulaa no anaanaxa'a. 18La ane'i mive'ave'a xalee tatalusi'a ta mitema no anu mii masumasua tatalu ane navu ilou umuxu mo taupea ialuxu ulaa no anaanaxa'a. 19Ta oosi ne, xavine'i muxolu no anaxa'a ilou xela'a mo xela'a iaulu xe kisou a uxolu no anu. La ane'i i'oxonu masuane'i ta mitema no anu.
20 iIa ta mitema ane isoisoli no anu mii masumasua tatalu uasi ne, ixiunu tumali'a no anu mii ma'ia ane ane'i mi'oxonu no avo'a uasi. Ane'i ikalu no anu 'ilixo sou ilolotu noxi'a ta ulee masumasua sou kalakalavoi ilo'a ta mimii ane mipuine'i no anu xoulu ilou siliva mo barasi xe lavo'o ilou ovu uasi. Ane'i ta mimii ne, ilavusou imamalei mo ilolomu xe imuamua'i uasi. 21Mo ane'i ixiunu tumali'a no anu 'ilixo sou ive'a ta mitema isoisoli mo 'ilixo sou saasaa iouiou mo 'ili'ilixo masumasua iouiou sou vote'i xe 'ilixo sou pakali uasi.
Copyright information for
ATA